[有片] 高科技+歷史故事主題 密室逃脫！

密室逃脫遊戲*由幾年前全盛時期全港四五十間，到今時今日只係剩番10幾間……
(*真人密室逃脫遊戲於特定空間中通過裝修設計，營造逼真場景，然後賦予玩家不同任務同故事劇情，俾玩家於指定時間內，通過尋找線索、團隊合作、層層解謎，最終完成任務走出密室。)

TopFun今日黎到銅鑼灣o既呢間密室，一探佢能夠保持迄立不倒o既奧秘！

步上樓梯，望入門口，見到一間裝修好似書店Cafe咁o既鋪頭，原來呢間就係我地今日要到訪o既密室！個大堂又幾典雅特別喎！仲以為自己去錯左同幢大廈o既韓國書店，哈哈～

可能因為位於銅鑼灣旺區，即使當日係星期一中午，都不斷有客上黎玩，所以最好都係上網或者打電話過去book定先～

聽負責人講，呢間密室原來已經開業左超過3年，而且於全球各地都有分店，例如：澳洲、加拿大、台灣等等。

銅鑼灣全店有7間密室房，最特別o既地方，相信係遊戲主題都係以真實歷史故事改編而成，例如係盜取十二生肖銅首、出埃及記等等。密室並唔係行恐佈路線，大人細路都玩得。負責人更加表示，其實親子玩呢類遊戲，透過一齊解謎，更加可以睇到兩代人唔同o既諗法，增加雙方o既溝通同更互相了解。玩完之後，仲可以識多一個歷史故事添！

其中當日試玩左阿爾卡特拉斯，係講一個美國o既越獄計劃故事。整間密室目測大概200呎，裝修成監獄咁樣，雖然一人獲發一支電筒，但燈光唔算暗。

玩家一開始會分別被困o係3個囚房，要先各自搵線索，諗辦法離開自己間囚房，再一齊解題，逃出監獄。

雖然話各自被困，但係3個囚房裏面o既玩家都需要透過對方給予o既工具同線索，先可以成功出到去，講求大家o既溝通技巧同合作性。

另外房間裏面設有一部對講機，如果遇到咩問題，或者真係解唔到需要提示，都可以透過對講機同前臺店員聯絡，佢地會遙距咁提供指示，咁就無須出出入入阻礙遊戲進度。

由於呢間店o既密室語言有齊中英文，所以都吸引左唔少外國遊客黎玩。店員除左基本要記得哂每間房o既故事背景同機關之外，仲要操流利中英文，要求比較嚴格。

呢間店另外一個特別o既地方，係機關相對比較高科技，就咁搵鎖匙開箱果d關卡比較少，用其他特別儀器o既機關比較多，例如係鐳射槍、紅外線、自動門等等，令成個體驗比較豐富。

整體黎講密室關卡謎題合乎邏輯，難度適中，裝修都算有氣氛，見到其他玩家玩完個樣都幾開心，但係就稱不上好特別好驚喜。未玩過密室逃脫，或者鐘意呢類動腦筋遊戲o既朋友仔，都不妨可以試下～！至於密室逃脫迷，就緊係每一間都唔會錯過啦，哈哈～

＊＊＊P.S. 臨俾錢前向店員展示Like左呢個post，再Like埋佢地FB Page，仲會送番張$10優惠券俾你下次用添。＊＊＊

＞＞更多相片同價目表等相關資料：迷之密失 LosT HK (銅鑼灣店)

＞＞更多密室逃脫店鋪：全港密室逃脫玩點資料