2015年最後一日，唔少人都會寫番篇回顧文。搵野玩，黎TopFun！TopFun要寫回顧文，梗係要寫番篇同玩有關架啦！:D
近年黎，香港越黎越多新野玩！就等我地回顧下2015年十大新玩點類型啦！
Crazy Cart係美國一間公司發明o既電動玩具飄移車，近年紅爆美國。最近有年輕人將佢引入香港，賣車之餘仲開左個試車場，等大家可以體驗下飄移快感！
鐳射槍戰其實並唔係新野，據說o係好多年前都曾經興過，傳統一般會跟war game玩法，只不過變左用鐳射槍。2015年鐳射槍戰再度興起，主要係因為改變左地方(引入市區，例如銅鑼灣、旺角等地方)、改變左包裝(變得更新潮科幻)同收費模式，令到成件事更容易玩到同更好玩！
即睇：鐳射槍戰玩點資料及玩評
電動飄移板(Hoverboard)靠電力推動，基本上可以話係冇左扶手o既Segway(Hands Free Segway)，叉足電可以行十幾公里，最高速達15km/hr。飄移板靠身體壓力操控，玩家只要企定定、身體稍微傾側，就可以前後移動同轉彎！玩點一般將Hoverboard配合各種遊戲同競賽，令成個體驗更加有特色同有趣！
走繩運動(Slacklining)類似行鋼線，考驗玩家身體平衡感、柔韌性，亦對心理調節有好處。走繩對戰(Slacklining Battle)則係以走繩運動為基礎，二人於繩上對戰o既遊戲。玩家既要自我平衡，又要努力令對方失平衡，造成一場激烈o既龍爭虎鬥！
即睇：走繩對戰(Slacklining Battle)玩點資料及玩評
肥仔衫(Fat Suit)可以令你同朋友們o既活動更加有趣同令人捧腹大笑！玩家們着住各式各樣肥仔衫開一個好玩又搞笑o既肥仔衫派對！一齊玩唔同o既競技賽同各種專為肥仔衫而設o既獨特遊戲！
桌上足球(Pool Soccer)源自法國，係一種結合左美式桌球同足球特式o既玩意，玩家們o係一張巨大桌球枱上，用腳將好似足球咁大o既桌球踢撞入洞中。呢項遊戲唔講求力度，反之隊友間o既合作更為重要，參與人數不限，新奇有趣。
桌上保齡(Pool Bowling)或者又叫保齡桌球，係一個曾經於韓國大熱綜藝節目《Running Man》裏面出現過o既遊戲。簡單d黎講就係於一張巨大桌球枱上，用手將好似保齡球咁大o既桌球撞入洞中。新潮有趣，適合一大班人玩。
桌上沙壺據說係15世紀宮廷玩意，玩法類似奧運冰壺，枱上面鋪左沙粒而且設有唔同得分區，只要將鐵餅狀球推去得分區，累積最高分o既一方就獲勝。遊戲最難係力度控制，因為軌道非常滑，即使輕輕一推，鐵餅球都會好容易滑出界。桌上沙壺遊戲適合二人對戰，好快就玩完一局。
4Way Air Hockey即四人氣墊球，同一般氣墊球機唔同o既地方在於四人對戰、有四塊氣墊球、同埋係以淘汰扣命際形式玩，最後留低o既就係勝利者！每局最多時限3分鐘。
即睇：桌上沙壺、4Way Air Hockey玩點資料及玩評
打住真人版Hunger Game旗號，攻防箭(Archery Tag)係由美國人John Jackson發明o既一種射箭運動，以特別設計o既弓箭o係半個籃球場大小o既地方進行，形式近似閃避球，兩隊約五人o既隊伍以弓箭為主要裝備，互相用箭射擊淘汰對手，將對方靶上o既目標打下或者將所有對手淘汰為勝。岩哂鐘意追求刺激o既中青年人！
室內沙灘正確d黎講係2014年12月尾開業，不過大概都係2015年先為人所知。呢個概念據說係港人由台灣帶過黎，o係鋪滿經消毒o既沙o既室內環境入面，玩家可以玩各種吹氣設施同遊戲、影相、開Party等，小朋友亦都可以簡簡單單跳彈床堆下沙。好多人以為室內沙灘做唔住，甚至以為已經冇左；不過據消息指，室內沙灘已經開始賺緊錢架喇！
即睇：室內沙灘玩點資料及玩評
2015年除左有呢十大新玩點類型之外，亦都有一d既有玩點類型加入左新元素！例如：
波波池充滿唔少童年回憶，不過宜家人大左，好多波波池都太細唔岩玩。有年輕人專登係Party場加多一個波波池房，裏面佈滿波波，等大人都可以展現童心，大玩特玩！
戲院包場價錢不菲，有Party房就佈置到仿如迷你私人影院，設有大screen同仿戲院凳，等你可以同另一半或者一班老死享受「包場睇戲」o既感覺！
普通層層疊去Café就玩得多喇，有Party房店主特製巨型層層疊俾你挑戰！砌起上黎成個人咁高，夠哂令人緊張同震撼！
即睇：主題Party房(Party House)玩點資料及玩評
緊貼潮流，以上咁多個新潮玩點，你又玩過幾多個？
我地展望2016年香港更多新野玩！
大家「搵野玩，黎TopFun！」玩得開開心心！<3
今年聖誕/除夕/新年/情人節檔期香港有2個主打機動遊戲o既嘉年華玩！分別係於中環新海濱舉行o既AIA歐陸嘉年華同於前啟德機場跑道舉行o既東華慈善嘉年華。
究竟2大嘉年華有咩分別？即睇以下大比拼圖表！
1. 鬥機動遊戲
AIA嘉年華經典機動遊戲+今年新機動遊戲，連同合家歡小朋友都岩玩o既機動遊戲總共多達三十幾款！目前經機電署批左玩得o既都有廿幾款。主打經典50米高G-Force變奏Mach5，望落都覺得刺激。
東華嘉年華向機電署申請左18款機動遊戲牌照，目前開幕首日6款已獲「使用及操作許可證」，所以有部份機動遊戲都未玩得，甚至係未組裝好。主要有4大機動遊戲，加幾個合家歡小朋友都岩玩o既機動遊戲，整體機動遊戲數目較AIA嘉年華少。主打2015年瑞士創新製造o既機動遊戲「陀飛輪」同27層樓高跳樓機，勝在多樣化同有新鮮感！
2. 鬥多野睇多野玩
AIA嘉年華除左機動遊戲攤位遊戲之外，仲有真雪溜冰場(需另付遊戲代幣)、紫色牛牛劇場(需另行購票)、迷你地標模型、舞台表演同手工聖誕燈飾，就算唔係咁岩玩機動遊戲都可以溜下冰，睇下表演，影下靚相。
東華嘉年華除左機動遊戲攤位遊戲之外，仲有英國皇家絕技團(需提早另行訂票)，表演高難度技巧o既特技節目踩鋼線、最令人歡樂o既小丑同壓軸演出o既「電單車極速激戰」，岩哂鐘意睇雜技o既朋友仔！
3. 鬥價錢
價錢方面，AIA嘉年華同東華嘉年華2個相差唔多，扣番代幣或者代用劵價值，入場費分別為$25同$20。大型機動遊戲每部每次大約$100，小型機動遊戲每部每次大約$30。攤位遊戲每次大約$20。
4. 鬥攤位公仔特別
唔少朋友仔去嘉年華旨在玩攤位，誓要贏番個公仔做戰利品俾小朋友或者另一半拎番屋企開心下，做節日禮物。AIA嘉年華今年準備左過百萬隻公仔，除左一般熊仔豬仔迪士尼公仔之外，最吸睛o既可以話係相當受歡迎o既黃色小兵minions。東華嘉年華攤位遊戲於嘉年華開幕首日23/12/2015並未set up，要留意下幾時去先開始有得玩！根據情報，除左一般迪士尼公仔同熊貓仔等等之外，最特別同驚喜o既公仔可以話係2015年hit爆o既Inside Out公仔喇！有啊愁啊燥等等坐陣！
5. 鬥規模鬥意義
AIA嘉年華已經o係香港搞左唔少次，雖然舊年(2014)開幕時好似有部份機動遊戲未玩得o既問題，但係今年到目前為止開幕已經超過一星期，暫時都未聽到有咩問題/投訴，似乎已經run得smooth左。東華嘉年華今年第一年舉行，開幕日子比最初公佈延遲左2日，亦都多推左個家庭慈善體驗日(23-27/12/2015)。23日開幕時有玩家表示唔知未有攤位遊戲玩，而且安排有少少混亂。可能始終東華嘉年華係第一年o係呢個地點搞，部份機動遊戲亦都係新o既。不過東華嘉年華有慈善性質，整個活動部份收益主辦單位會撥捐東華三院，支持其兒童、青少年及低收入家庭服務；玩o既同時又可以做善事！
6. 鬥交通方便
AIA嘉年華於中環新海濱舉行，交通尚算方便；東華慈善嘉年華於前啟德機場跑道舉行，地點較為偏遠，不過大會備有穿梭巴士，供參加者免費往返嘉年華會場及油塘。
想分別睇詳盡d？
即睇AIA嘉年華2015/2016有咩玩！：http://goo.gl/lxkBvl
即睇東華嘉年華2015有咩玩！：http://goo.gl/XFvTxy
想睇紅葉？唔一定要去日韓美加北京o既，香港都一樣有得睇！ 😉
幾時岩去睇紅葉？
基於氣候關係，香港o既紅葉期都比緯度較高o既日本同韓國遲，每年大概11月尾至1月頭就係香港紅葉o既熱門時期，而最佳觀賞時期會因應每年氣候微調而變化。一般黎講，天氣開始凍少少，d葉先會開始轉紅。
香港邊度有紅葉睇？
香港有得睇紅葉o既地方其實都唔少，較為人知o既有元朗大棠，不過近幾年都人頭湧湧。其實香港仲有好多地方都有種植紅葉品種植物，港大中大校園啊、香港公園、青衣公園啊、城門水塘啊、郊區啊等等。每個熱點o既詳細介紹同資料，可以睇番TopFun 賞楓/睇紅葉 o既玩點分類。:)
去睇紅葉着乜好？
由於部份睇紅葉熱點落車之後需要行好一段路先到，所以o係衣着方面都係建議簡單舒適輕盈為主。想同紅葉一齊影d靚相的話，建議唔好着太多圖案或者花紋o既衫，因為紅葉本身影出黎就一大堆咁樣，如果再著到成身豹紋、波點，甚至係迷彩、花色，望落去張相度成個感覺就會心比較亂。而顏色方面，避免同背景大自然融為一體，記住最好唔好着紅、黃、綠色啊！講究d想更加有秋意冬日感覺o既話，仲可以o係配飾方面花心思，考慮戴冷帽、頸巾、或者耳罩。當然，衣着都要視乎番當日氣溫，唔好凍親或者焗親。
睇紅葉要帶d乜？
其實去睇紅葉都冇話特別要帶d乜野工具，因為基本上用肉眼就可以睇到。如果係情侶拍拖或者一家人想去影靚相的話，可以考慮帶自拍棍(自拍神器)或者腳架。想扮下文青，o係片片紅葉樹下影充滿意境o既文青相的話，可以帶一本書。如果諗住順便去野餐o既，仲可以帶定靚靚枱布同小量食物添。
小知識
香港o既紅葉其實並唔係楓樹(屬槭樹科)o既楓葉，而係黎自楓香樹。由於兩者o既樹葉外形好似，而且都係會o係秋天變成紅色，所以香港紅葉經常被誤以為係黎自楓樹。楓葉一般係掌狀五裂，而楓香樹樹葉呢，就多數係三裂掌狀，香港紅葉主要係楓香樹品種。其他香港紅葉樹種仲有欖仁樹、野漆樹、槭樹、山烏桕、落羽松同水杉等等。各種樹葉外形不一，各顯美態。
(記住玩完之後黎TopFun留番個玩評同大家分享下啊!)
聖誕假有咩玩？有咩好去處適合一大班朋友去玩呢？搵野玩，黎TopFun！等我地舉d例子啦~ 以下5個類別o既玩點(玩樂好去處)都相當適合大家聖誕去玩架！
自拍館有唔同主題o既房，裏面有攝影器材、螢幕、唔同背景同各種服飾道具。一大班人Re-U、抑或係家庭親子樂，都可以o係房裏面擺poses扮鬼扮馬自拍靚相留念啊！聖誕節仲可以影番d 聖誕Look相，扮下聖誕老人，放上FB呃Like添 😛 自拍館絕對係鐘意玩selfie o既人o既好去處！
即睇: 各間自拍館資料同玩評
一大班人想開Christmas Party又冇地方？宜家有計喇！主題Party房唔單止提供聚會Re-U私人空間，仲有靚靚主題佈置，好多仲有飲品提供，同遊戲機、board game、桌上足球等玩樂物品借用。幾個朋友仔傾下計玩下？聖誕除夕過年過節Party？主題Party房就岩哂你！記得要提前訂房啊！
即睇: 各間Party房資料同玩評
渡假屋，又寫作度假屋，係專為用戶渡假而設o既房屋。度假屋一般起o係渡假勝地，又或者遠離都市o既離島同郊外地方。渡假屋分唔同大細，有d甚至包埋露台天台。岩哂一大班人Re-U開 Christmas Party玩通宵，仲可以打邊爐燒野食架。提示︰聖誕都係旺季黎架，快d Book房。
即睇: 各間渡假屋資料同玩評
Boardgame Cafe指提供眾多桌上遊戲o既樓上咖啡店，除左一般平時我地見慣見熟o既games之外，有好多黎自唔同國家o既桌上遊戲；部份店鋪更加有店員細心教你玩。聖誕唔想剩係玩啤牌？Boardgame Cafe係唔錯o既選擇！:)
想玩d動態d o既野？新興o既玩樂好去處 ──泡泡足球啦！泡泡足球(Bubble Soccer)o係約三年前由英國人Lee Moseley發明，即時風靡英國，宜家更發展至海外如美國、澳洲及香港。所謂o既泡泡足球，其實就係玩家着上大型PVC泡泡裝o係場上踢足球。大家踢來踢去，撞來撞去，唔單止充滿趣味，仲有一定運動量呢！健康又歡樂，一次過滿足你兩個願望。最岩一大班人Re-U玩番幾個鐘！一齊過番個充滿活力o既聖誕！
即睇: 各間泡泡足球資料同玩評
希望以上o既建議幫到大家諗聖誕去邊玩啦！:D 當然除左以上5樣之外都仲有好多其他玩點(玩樂好去處)架~ 大家可以用 http://top-fun.com.hk o既搜尋器選擇適合自己o既香港好去處。
![[有片] BALL ROOM刺激四人星戰，4Way Air Hockey你玩過未？！](https://topfunhk.wpenginepowered.com/wp-content/uploads/2015/12/刺激四人星戰，4Way-Air-Hockey你玩過未？！-10.jpg)
近期星戰回歸，o係香港相當之hit！
TopFun收到風，有個玩點(玩樂好去處)最近引入左樣好似星戰咁令人緊張刺激o既玩意，運送過程中仲出動埋吊臂起重車咁，勁誇張！
(Youtube片段截圖)
搵野玩，黎TopFun！就等我地帶你睇下有咩新奇玩意～！
情報指星戰發生o係一幢荔枝角工廈, 暗號係417。哦～原來，係荔枝角o既BALL ROOM。
BALL ROOM係2015年先開o既新玩點, 一個以美式工業為主題o既活動場所，亦係香港首間引入PoolSoccer桌上足球o既地方。創辦人話佢地o既宗旨就係致力帶d新野俾大家玩。開業未夠一年, 已經有觀塘同荔枝角2間店喇！
今日我地TopFun黎到荔枝角分店, 就即管睇下有咩新野玩!
首先試玩o既係主打──PoolSoccer桌上足球。 桌上足球源自法國，英文名原本叫Snookball。 黎到香港，BALL ROOM親自重新設計訂造波枱同波，經過多番嘗試同改良先成功架！唔係一般淘寶貨色。木波枱大概3米乘6米，鋪上厚氈；波就同平時足球差唔多大，不過感覺上重過足球少少。荔枝角分店o既波枱入波果陣仲有燈效同聲效!
開始之前負責人會講解下點玩，基本上係跟桌球玩法，不過以腳代cue，再融入埋足球o既界外球、傳波、傾戰略等等。初初仲以為桌上足球好似桌球咁主要得2個人有得玩，大家輪住咁玩。原來玩家主要分成2隊比賽，大家互相合作，諗下點樣set波、踢邊個波入邊個洞、點樣傳波。2個玩又得，十幾人一齊玩都得！
唔識打桌球又唔識踢波？創辦人之一Kase話，識玩，其實係玩個氣氛。就好似你睇獎門人咁，有時一大班人一齊玩，大把得意蝦碌野，贏輸唔緊要，最緊要係笑得開心！
一般黎講每局大概會玩15-30分鐘，視乎大家技術而定啦，哈哈～
玩PoolSoccer記得要着襪。不過如果冇o既話，BALL ROOM都會有襪賣o既。
跟住見到有個美國隊長咁樣樣o既野…… 咦！睇奧運好似見過類似o既野噃～
原來係桌上沙壺！
桌上沙壺據說係源自15世紀o既英國宮廷玩意。黎到香港，改良版本，沙壺枱都係訂造o既！香港暫時似乎冇乜地方有得玩。
玩法好簡單，每次2個人玩，每個人有4個鐵餅，大家輪流將鐵餅推到去美國隊長盾牌圈圈果個位。最後停o係圈裏面最近紅心o既鐵餅就贏喇～！
不過…… 太細力又去唔到圈圈; 太大力又跌落坑…… 都有d難度架。仲可以撞對手鐵餅落坑添。
呢個比較快就玩完，一局只係幾分鐘左右。
最後試玩4Way Air Hockey！！！遠道由美國買番黎，4個人對戰o既氣墊球！
小編其中一樣o係冒險樂園最鐘意玩o既野就係氣墊球喇！
普通2人對戰氣墊球機相信大家都玩過～
4個人玩4塊氣墊球o既4Way Air Hockey你又玩過未？！
一般氣墊球機玩法係鬥高分，呢部4Way Air Hockey則係淘汰際o既。
每次每個玩家要入一個金幣，每人有5條命，一局限時3分鐘，每俾人入一球就扣一條命。扣哂果個玩家就輸架喇，閘亦都會閂埋。最後留番o係度o既一個玩家，就係勝利者喇！哈哈哈哈！
點解話似星戰呢？除左因為玩起上黎好似星球大戰咁混亂之後，仲因為d氣墊球就好似星球咁飛黎飛去，撞黎撞去，大家o係攻擊敵方星球同時，又要守護自己星球。
4人對戰比起2人對戰更加緊張刺激，同埋更令人手忙腳亂。又會出現圍攻，或者以一敵三等等情況。雖然只係短短幾分鐘一局，但大家玩得夠癲的話都幾chur架，玩完都真係有d攰。
除左3樣主打之外, 場內仲有Boardgame, PS同飛鏢機。玩到攰，又可以坐下抖下。
更多BALL ROOM相片同價目表等相關資料, 可以睇番：BALL ROOM荔枝角分店
仲有唔夠一個月就聖誕喇～！想提早感受節日氣氛？
除左去尖沙咀或者各大小商場睇燈飾之外，黎緊下星期西貢有個合家歡聖誕嘉年華！即刻睇睇介紹～
Hong Kong Golf & Tennis Academy Charity Foundation（HKGTA Charity Foundation）連續第二年同西貢區社區中心攜手呈獻西貢聖誕嘉年華，安排一連串活動，希望令西貢區市中心充滿聖誕佳節歡欣氣氛。本年度西貢聖誕嘉年華將會於2015年12月5日至6日一連兩日o係西貢美源街舉行，開放時間由上午11點至下午5點，適合一家老少一齊歡渡週末迎聖誕！
西貢聖誕嘉年華屆時將雲集超過30家特色攤位，無論各種精緻禮品、手作工藝品、聖誕飾物、美酒輕食等等都一應俱全；仲有各式各樣o既攤位遊戲、面部彩繪、小丑扭氣球同充氣彈床城堡！
表演節目方面包括有由三育書院學生合唱團、Sing City成人合唱團同Sing City兒童合唱團獻上o既聖誕詩歌表演，同埋本地色士風樂團La Sax以全新方式演繹聖誕經典歌曲，悠揚樂韻令嘉年華更添聖誕氣氛。今年大會更加特地安排左三匹黎自國際騎術中心o既馬仔現身嘉年華，等小朋友可以體驗餵飼馬仔o既滋味，甚至可以一嘗騎馬仔o既樂趣同拍照留念。話明聖誕嘉年華，唔少得o既仲有「聖誕老人」會出沒添！
西貢聖誕嘉年華
日期： 2015年12月5日至6日（星期五至六）
時間： 上午11時至下午5時
地點： 西貢美源街（西貢區社區中心旁）
入場費： 免費
電郵： info@hkgtafoundation.org
網頁： http://www.hkgtafoundation.org/
香港真係越黎越多大型活動！
機動遊戲發燒友有福了，今年聖誕新年檔期，除左又有AIA嘉年華之外，仲有東華慈善嘉年華！
東華慈善嘉年華將於2015年12月21號至2016年3月28號假前啟德機場跑道舉行。
最近已經開始介紹各種機動遊戲同率先開放預售慈善票！
即刻睇睇有咩玩！
除左機動遊戲，仲有主題活動同美食街！不過相關資料就仲未公佈。
門票方面呢？
門票注意事項
東華三院慈善票優惠期有限，售完即止。
3歲以下幼童、65歲或以上長者及持有由香港特區政府 – 勞工及福利局簽發的「殘疾人士登記證」人士可免費入場。參加機動遊戲及攤位遊戲需另行付費。
11歲或者以下小童必須由另一個15歲或以上人士陪同入場。
如樂園內人數達滿額時將會採用一出一入式入場法, 網上訂票者可享優先安排進入
樂園內設增值服務，遊客可增值Mintcard以享用更多遊戲設施。
及早買慈善票平正價$35，有興趣o既玩家可以早d考慮下約埋朋友仔一齊去噃～！
日期: 2015年12月21日至2016年3月28日
地點: 前啟德機場跑道（鄰近啟德郵輪碼頭）
時間:
2015年12月21日至2016年1月3日：11am-11pm;
2016年1月4日開始：3pm-11pm(平日), 11am-11pm(星期五、六、日及公眾假期)
最後入場時間為活動結束前45分鐘。特別日期或延長開放時間，詳情容後公布。
網頁: http://www.twcarnival.hk/
Facebook: https://www.facebook.com/twcarnival
![[最齊最Update] 世界盃外圍賽「港中大戰」公眾睇波站一覽](https://topfunhk.wpenginepowered.com/wp-content/uploads/2015/11/最齊最Update-世界盃外圍賽「港中大戰」公眾睇波站一覽.jpg)
今晚(11月17號)就係世界盃外圍賽「港中大戰」喇！搶唔到飛又想一大班人一齊睇波？
今次有唔少團體都自發搞咗d戶外直播轉播，實行活用公共空間，等大家一齊感受場外睇波氣氛！
港九新界梗有一個o係你左近！
![[最齊最Update] 世界盃外圍賽「港中大戰」公眾睇波站一覽](http://topfunhk.wpenginepowered.com/wp-content/uploads/2015/11/最齊最Update-世界盃外圍賽「港中大戰」公眾睇波站一覽.jpg)
港島
西環： 石塘咀山道天橋下面空地 (詳情)、卑路乍街公園 (詳情)
鰂魚涌： 鰂魚涌柏架山道往街市行人天橋底 (詳情)
港大： 中山廣場 (詳情)
九龍
牛頭角： 依時工業大廈 天台 (詳情)
深水埗： 深水埗通州街玉器市場及政府臨時街市橋底 (詳情)
旺角：西洋菜街近豉油街隧道外 (詳情)
土瓜灣： 牛棚旁長櫈 (詳情)
大角咀： 埃華街公園 (詳情)
美孚： B出口經麥當勞旁進入萬事達廣場，步行至豐澤旁出口 (詳情)
新界
中大： 新亞書院圓形廣場 (詳情)、思源館 (詳情)
沙田： 排頭村沙田站B出口 (詳情)
屯門： 屯門站B出口側 (詳情)
馬鞍山： 耀安中心 (詳情)
科大： SeaFront (詳情)
恒管：M座平台 (只供同學參加) (詳情)
由於活動參與人數可能較多，現場可能人多擠迫，請大家遵守秩序，免生危險。
各主辦單位或有不同安排，詳情請參閱相關連結。
＊以上活動資料僅供參考，一切風險與責任TopFun概不負責。
![[有片] 瘋狂障礙跑11個障礙全面睇+必睇注意事項](https://topfunhk.wpenginepowered.com/wp-content/uploads/2015/11/All-11.png)
瘋狂障礙跑Crazy Inflatable Run下星期六o係香港舉行，參加者除左齋跑之外，亦都會沿途挑戰11個大型吹氣障礙！等你捐下爬下跳下瀡下…… 有趣地完成3公里路程跑步運動。
究竟11個障礙有d乜？同外國Insane Inflatable 5K又有冇唔同？ 參考網上片段，再加上瘋狂障礙跑Crazy Inflatable Run大會官方吹氣障礙設計圖，TopFun同你瘋狂障礙跑11個障礙全面睇，再加必睇注意事項！即刻去片！
大部份障礙同網上片段睇到o既都幾似，亦都有幾個係完全唔一樣o既～
官方吹氣障礙設計圖：
瘋狂障礙跑
日期: 21/11/2015
地點: 啟德郵輪碼頭對開空地
收費: 公開組(13歲以上) 每位$480
親子組(一位6-12歲小童及一位21歲或以上家長)每組$680
截止報名日期: 16/11/2015
查詢電話: 5901 7194 (10:00am – 07:00pm)
Facebook: www.facebook.com/crazyinflatablerun
其他資訊:
注意事項:
![[有片] 瘋狂障礙跑殺到，實物試玩率先睇！](https://topfunhk.wpenginepowered.com/wp-content/uploads/2015/11/瘋狂障礙跑殺到，實物試玩率先睇！5.jpg)
瘋狂障礙跑Crazy Inflatable Run下星期六o係香港舉行，參加者除左齋跑之外，亦都會沿途挑戰11個大型吹氣障礙！等你捐下爬下跳下瀡下…… 有趣地完成3公里路程跑步運動。
外國Insane Inflatable 5K o既網上片段相信大家都睇過，究竟今次Crazy Inflatable Run o係香港o既吹氣障礙實物又係點樣？即刻去片！
記招展出o既其中一個障礙”Can I Rest!”
上落位
裏面，基本上呢一個障礙就係一個吹氣彈床
彈床中間有條吹氣橫樑，負責人話係用黎防止跑手衝得太快衝左落去，幫你剎一剎制。捐過去又得，勁d跨彈過去亦得～ 😛
充氣位，拍埋去其實都有差唔多兩個人咁高。
瘋狂障礙跑
日期: 21/11/2015
地點: 啟德郵輪碼頭對開空地
收費: 公開組(13歲以上) 每位$480
親子組(一位6-12歲小童及一位21歲或以上家長)每組$680
截止報名日期: 16/11/2015
查詢電話: 5901 7194 (10:00am – 07:00pm)
Facebook: www.facebook.com/crazyinflatablerun
「粉紅高踭鞋慈善競跑比賽」係由香港遺傳性乳癌家族資料庫主辦o既年度慈善活動。
旨在提高公眾對遺傳性乳癌、卵巢癌同前列腺癌o既關注同認識，
而活動所籌得o既款項將用o係資助本地經濟有困難o既高危家庭進行BRCA基因突變測試同輔導工作。
比賽形式
參賽者須穿上不高於2吋同帶有粉紅色裝飾o既高踭鞋參賽。賽道全長100米設於赤柱大街。 比賽設有唔同項目; 分別為個人競跑賽、團體競技賽 同 歡樂競技賽。各項賽事都設有「冠軍」奬項。為左推廣大眾遺傳性乳癌o既關注，大會鼓勵參賽者以粉紅色裝扮出席活動以示支持，大會更特設「最奇趣服裝獎」同「最高籌款獎」以供角逐。
即刻睇睇舊年精華片段：
日期: 22. 11. 2015 (星期日)
時間: 12nn – 6pm
地點: 香港赤柱大街
詳情: http://pinkheels.hk/
Facebook: https://www.facebook.com/asiabreastregistry
一年一度「渣打藝趣嘉年華」又黎喇！
呢個全港每年一度大型社區藝術活動，今年踏入15周年。
今次活動由一群本地藝術家同逾千位青少年以古典音樂做靈感，將五首著名樂曲用創新視覺藝術同表演重新演繹，其中包括姆斯基‧高沙可夫o既《天方夜譚》（一千零一夜）、卡米爾‧聖桑o既《動物狂歡節》、莫扎特o既《魔笛》、拉威爾o既《鵝媽媽組曲》同埋史特拉汶斯基o既《士兵的故事》。
一連兩天o既嘉年華，有多個雄偉o既巨型木偶同閃爍迷人o既夜光作品（壓軸巡遊同夜光巡遊！）、卡祖笛同鼓樂工作坊、精彩o既藝術攤位同連續16小時o既舞台表演。
仲有D乜？！
– 70支本港年青隊伍勁歌熱舞
– 由鍾胤淇、何凱瑩、賀倩瑩、趙澳碧、李淘與125位香港青年藝術協會年青舞蹈員攜手創作o既5支原創舞蹈
– 鼓樂、卡祖笛與日舞大合奏
– 樂器101 近距獨奏會
– 免費藝術攤位及面部彩繪
– 5,000件看得見的希望作品
– 再一同創作你o既「#渣打藝趣嘉年華 15周年！」拼畫
日期: 14/11/2015 (星期六)
時間: 10:00am-5:00pm
日期: 15/11/2015 (星期日)
時間: 10:00am-4:30pm
地點: 銅鑼灣維多利亞公園中央草坪
查詢: amanda@hkyaf.com / 2214 0266
售票: 費用全免，不需門票
適合: 任何年齡人士參加
夜光巡遊
日期: 14/11/2015 (星期六)
時間: 8:30pm-9:30pm
地點: 銅鑼灣利園一期至希慎廣場
壓軸巡遊
日期: 15/11/2015 (星期日)
時間: 3:00pm-4:30pm
地點: 銅鑼灣維多利亞公園至東角道
費用: 費用全免，不需門票
查詢: amanda@hkyaf.com / 2214 0266
適合: 任何年齡人士參加
備註: 請盡量使用公共交通工具及預備充足時間前往場地。
網址: http://www.hkyaf.com/category/6/standard-chartered
Facebook: https://www.facebook.com/hkyaf/