近日途經長沙灣元洲邨，見到公園裏面冇啦啦有成堆人o係度舉機影相。
一睇，原來元洲邨公園裏面o既杜鵑花隧道開花喇！
呢條約30米長o既簕杜鵑花隧道，每逢3至4月，漸次綻放，構成浪漫動人景致，吸引唔少人專登停步影下靚相，甚至係專誠搭車過黎一睹如此萬紫千紅。目前正值開花初期，據知遲d應該會開得仲靚，至最美麗時期，仲會有滿地花瓣配合整個景致！
當日仲遇到model專登黎擺post影相～
無論係親子去公園玩賞花影靚相、三五知己閒逛、抑或係情侶o係花廊中拖手漫步，都寫意非常，能夠令人心曠神怡。
除左簕杜鵑花隧道之後，附近亦種有其他花種，以及香港常見o既洋紫荊花。
元洲邨杜鵑花隧道
開花時期：3月-4月
地點：長沙灣元洲邨公園 (長沙灣港鐵站C2出口)
一年一度於維園舉行o既香港花卉展覽又黎喇！鐘意賞花同影靚相o既朋友仔又係時候出動！
2016年香港花卉展覽將於3月11日至20日於銅鑼灣維多利亞公園舉行。大家除左可以欣賞到花型秀麗、顏色奪目o既主題花「洋彩雀」同各地花卉之外，仲可以觀賞到黎自本地、內地同海外園藝機構展出悉心栽培o既盆栽、造型優美o既花藝擺設，以及色彩繽紛o既園景設計。會場更設有售賣花卉同其他園藝產品o既銷售攤位。
(康文署2015花卉展覽相片)
展覽期間，亦另有學童繪畫比賽、攝影比賽、展品比賽、音樂及文娛表演、花藝示範、綠化活動工作坊、綠化推廣攤位、導賞服務、康體活動及親子遊戲等等活動。
香港花卉展覽2016
地點 : 香港維多利亞公園
日期 : 2016年3月11日至20日﹝共10天﹞
時間：上午9時至晚上9時
主題花 : 洋彩雀
主題 : 花薈藝萃
入場費 :
全費 14元
優惠收費 7元
4至14歲兒童、全日制學生
60歲或以上長者
殘疾人士及其照管人 (每名殘疾人士只可與一名照管人同享優惠)
星期一至星期五期間之入場優惠：
60歲或以上長者免費參觀
殘疾人士及其照管人免費參觀 (每名殘疾人士只可與一名照管人同享優惠)
30人或以上的團體可獲成人半價優惠，惟團員必須一同進場
查詢 : 2601 8260
網址：http://www.lcsd.gov.hk/tc/hkfs/2016/
預售入場券
有意參觀者可在二月二十二日至三月十八日親臨各分區康樂事務辦事處於收費時間內購票，亦可於花展期間在會場入口處購票。門票費用須以現金繳付。有意參觀者亦可以八達通繳費入場。
想睇紅葉？唔一定要去日韓美加北京o既，香港都一樣有得睇！ 😉
幾時岩去睇紅葉？
基於氣候關係，香港o既紅葉期都比緯度較高o既日本同韓國遲，每年大概11月尾至1月頭就係香港紅葉o既熱門時期，而最佳觀賞時期會因應每年氣候微調而變化。一般黎講，天氣開始凍少少，d葉先會開始轉紅。
香港邊度有紅葉睇？
香港有得睇紅葉o既地方其實都唔少，較為人知o既有元朗大棠，不過近幾年都人頭湧湧。其實香港仲有好多地方都有種植紅葉品種植物，港大中大校園啊、香港公園、青衣公園啊、城門水塘啊、郊區啊等等。每個熱點o既詳細介紹同資料，可以睇番TopFun 賞楓/睇紅葉 o既玩點分類。:)
去睇紅葉着乜好？
由於部份睇紅葉熱點落車之後需要行好一段路先到，所以o係衣着方面都係建議簡單舒適輕盈為主。想同紅葉一齊影d靚相的話，建議唔好着太多圖案或者花紋o既衫，因為紅葉本身影出黎就一大堆咁樣，如果再著到成身豹紋、波點，甚至係迷彩、花色，望落去張相度成個感覺就會心比較亂。而顏色方面，避免同背景大自然融為一體，記住最好唔好着紅、黃、綠色啊！講究d想更加有秋意冬日感覺o既話，仲可以o係配飾方面花心思，考慮戴冷帽、頸巾、或者耳罩。當然，衣着都要視乎番當日氣溫，唔好凍親或者焗親。
睇紅葉要帶d乜？
其實去睇紅葉都冇話特別要帶d乜野工具，因為基本上用肉眼就可以睇到。如果係情侶拍拖或者一家人想去影靚相的話，可以考慮帶自拍棍(自拍神器)或者腳架。想扮下文青，o係片片紅葉樹下影充滿意境o既文青相的話，可以帶一本書。如果諗住順便去野餐o既，仲可以帶定靚靚枱布同小量食物添。
小知識
香港o既紅葉其實並唔係楓樹(屬槭樹科)o既楓葉，而係黎自楓香樹。由於兩者o既樹葉外形好似，而且都係會o係秋天變成紅色，所以香港紅葉經常被誤以為係黎自楓樹。楓葉一般係掌狀五裂，而楓香樹樹葉呢，就多數係三裂掌狀，香港紅葉主要係楓香樹品種。其他香港紅葉樹種仲有欖仁樹、野漆樹、槭樹、山烏桕、落羽松同水杉等等。各種樹葉外形不一，各顯美態。
(記住玩完之後黎TopFun留番個玩評同大家分享下啊!)