繼上年年尾Crazy Cart飄移車之後，觀塘工廈最近又有一個新興潮流玩點(好去處)！
搵野玩，黎TopFun！即刻跟我地一齊去睇睇！
原來，Azzita平衡車體驗-維修中心最近o係觀塘開設左一個約5000呎o既電動平衡車試玩場，場地以水馬圍成軌道，並備有頭盔、護膝等，俾大家體驗試玩平衡車呢樣新興玩意！
對於大部份未接觸過未玩過平衡車o既玩家，可能有好多疑問，尤其係可能最關心o既：第一次玩究竟要幾耐先學識？會唔會好容易仆？
就等TopFun同你實地試玩直擊！
開始試玩之前，首先要戴好全款保護裝備，包括頭盔、護踭、護腕、護膝。跟住就可以揀平衡車試下玩。
Azzita有多款唔同大細款式o既平衡車，負責人建議第一次玩的話試10寸呔果款，因為果款屬充氣呔，避震能力較強，亦都較易控制。
試玩費用除左包括平衡車同保護裝備租用之外，仲包括數分鐘專人指導，等大家o係正式出軌道玩之前，先學識點樣上落同控制平衡車。
學習區：
相比起學踩單車、溜冰等等需要一段時間先平衡到，學平衡車只需要短短數分鐘。
首先踩上一邊重心腳，等企穩之後再迅速踩上另一隻腳，然後透過兩腳同身體攞平衡點，當車大致可以停o係度，就攞到平衡點。
開車時只要人微微向前傾，或者前腳掌用力，平衡車就會自動前駛。相反，如果腳踭用力，平衡車就會倒後行。
雖然最初都會有少少擔心跌，或者撞牆撞水馬，但係玩落就會發覺其實都係唔容易跌o既。
至於每兜一個圏要用幾耐時間，就好視乎你o既技術，最快可以20幾秒，慢o既亦都可以需要幾分鐘。
負責人表示，水馬軌道會定期改變，以增加新鮮感；10人以上甚至可以包場開Party，特別安排不同水馬軌道或遊戲。
總括黎講，平衡車試玩都不失為一個充滿新鮮感同有趣o既體驗！
Q & A：
Q1. 幾多歲先玩得？
A1. 負責人建議11歲或以上。
Q2. 需要/可以自備平衡車去玩嗎？
A2. 試玩費用已包括租用平衡車及保護裝備，玩家無需自備平衡車。另外，為確保安全，Azzita禁止自備平衡車於場內行駛。
Q3. 衣着規限？
A3. 上身基本上無特別規限，建議穿着較舒適鬆身衣物。鞋方面，不能穿着拖鞋、高踭鞋或Boots(底太厚影響用力感應)，學生皮鞋亦不甚適合；建議穿着運動鞋為佳。
Q4. 可唔可以walk-in？
A4. 可以walk-in，但由於軌道限每次最多同時12人一齊玩平衡車，以避免擠迫，所以最好都係先查詢預約，咁就唔會黎到先發現full左要等。
Q5. 平衡車時速？
A5. 一般平衡車最高時速可達10-15km/h，當車到達某個速度上限會有提示逐步減速，以確保安全。
Q6. 會爆炸嗎？
A6. 過往新聞報導上的平衡車爆炸事件，一般因為電池質量出現問題或欠缺保險絲，引致過熱危險。Azzita平衡車具備多項證書及合格安全認証，包括CE,FCC等國際認證；充電器用三腳帶保險絲插頭，電池則採用三星電池，相對安全。
Q7. 香港有咩地方可以玩平衡車？
A7. 電動飄移板 / 電動平衡車 (Hoverboard) 其實o係香港都出現左一段時間，不過由於法例上規限，基本上一般公眾地方都唔玩得，只有室內私人地方可玩。
>>Azzita電動平衡車體驗-維修中心營業時間及價目表等資料：http://goo.gl/izTxUy
![[有片] BALL ROOM刺激四人星戰，4Way Air Hockey你玩過未？！](https://topfunhk.wpenginepowered.com/wp-content/uploads/2015/12/刺激四人星戰，4Way-Air-Hockey你玩過未？！-10.jpg)
近期星戰回歸，o係香港相當之hit！
TopFun收到風，有個玩點(玩樂好去處)最近引入左樣好似星戰咁令人緊張刺激o既玩意，運送過程中仲出動埋吊臂起重車咁，勁誇張！
(Youtube片段截圖)
搵野玩，黎TopFun！就等我地帶你睇下有咩新奇玩意～！
情報指星戰發生o係一幢荔枝角工廈, 暗號係417。哦～原來，係荔枝角o既BALL ROOM。
BALL ROOM係2015年先開o既新玩點, 一個以美式工業為主題o既活動場所，亦係香港首間引入PoolSoccer桌上足球o既地方。創辦人話佢地o既宗旨就係致力帶d新野俾大家玩。開業未夠一年, 已經有觀塘同荔枝角2間店喇！
今日我地TopFun黎到荔枝角分店, 就即管睇下有咩新野玩!
首先試玩o既係主打──PoolSoccer桌上足球。 桌上足球源自法國，英文名原本叫Snookball。 黎到香港，BALL ROOM親自重新設計訂造波枱同波，經過多番嘗試同改良先成功架！唔係一般淘寶貨色。木波枱大概3米乘6米，鋪上厚氈；波就同平時足球差唔多大，不過感覺上重過足球少少。荔枝角分店o既波枱入波果陣仲有燈效同聲效!
開始之前負責人會講解下點玩，基本上係跟桌球玩法，不過以腳代cue，再融入埋足球o既界外球、傳波、傾戰略等等。初初仲以為桌上足球好似桌球咁主要得2個人有得玩，大家輪住咁玩。原來玩家主要分成2隊比賽，大家互相合作，諗下點樣set波、踢邊個波入邊個洞、點樣傳波。2個玩又得，十幾人一齊玩都得！
唔識打桌球又唔識踢波？創辦人之一Kase話，識玩，其實係玩個氣氛。就好似你睇獎門人咁，有時一大班人一齊玩，大把得意蝦碌野，贏輸唔緊要，最緊要係笑得開心！
一般黎講每局大概會玩15-30分鐘，視乎大家技術而定啦，哈哈～
玩PoolSoccer記得要着襪。不過如果冇o既話，BALL ROOM都會有襪賣o既。
跟住見到有個美國隊長咁樣樣o既野…… 咦！睇奧運好似見過類似o既野噃～
原來係桌上沙壺！
桌上沙壺據說係源自15世紀o既英國宮廷玩意。黎到香港，改良版本，沙壺枱都係訂造o既！香港暫時似乎冇乜地方有得玩。
玩法好簡單，每次2個人玩，每個人有4個鐵餅，大家輪流將鐵餅推到去美國隊長盾牌圈圈果個位。最後停o係圈裏面最近紅心o既鐵餅就贏喇～！
不過…… 太細力又去唔到圈圈; 太大力又跌落坑…… 都有d難度架。仲可以撞對手鐵餅落坑添。
呢個比較快就玩完，一局只係幾分鐘左右。
最後試玩4Way Air Hockey！！！遠道由美國買番黎，4個人對戰o既氣墊球！
小編其中一樣o係冒險樂園最鐘意玩o既野就係氣墊球喇！
普通2人對戰氣墊球機相信大家都玩過～
4個人玩4塊氣墊球o既4Way Air Hockey你又玩過未？！
一般氣墊球機玩法係鬥高分，呢部4Way Air Hockey則係淘汰際o既。
每次每個玩家要入一個金幣，每人有5條命，一局限時3分鐘，每俾人入一球就扣一條命。扣哂果個玩家就輸架喇，閘亦都會閂埋。最後留番o係度o既一個玩家，就係勝利者喇！哈哈哈哈！
點解話似星戰呢？除左因為玩起上黎好似星球大戰咁混亂之後，仲因為d氣墊球就好似星球咁飛黎飛去，撞黎撞去，大家o係攻擊敵方星球同時，又要守護自己星球。
4人對戰比起2人對戰更加緊張刺激，同埋更令人手忙腳亂。又會出現圍攻，或者以一敵三等等情況。雖然只係短短幾分鐘一局，但大家玩得夠癲的話都幾chur架，玩完都真係有d攰。
除左3樣主打之外, 場內仲有Boardgame, PS同飛鏢機。玩到攰，又可以坐下抖下。
更多BALL ROOM相片同價目表等相關資料, 可以睇番：BALL ROOM荔枝角分店
![[有片] 瘋狂障礙跑11個障礙全面睇+必睇注意事項](https://topfunhk.wpenginepowered.com/wp-content/uploads/2015/11/All-11.png)
瘋狂障礙跑Crazy Inflatable Run下星期六o係香港舉行，參加者除左齋跑之外，亦都會沿途挑戰11個大型吹氣障礙！等你捐下爬下跳下瀡下…… 有趣地完成3公里路程跑步運動。
究竟11個障礙有d乜？同外國Insane Inflatable 5K又有冇唔同？ 參考網上片段，再加上瘋狂障礙跑Crazy Inflatable Run大會官方吹氣障礙設計圖，TopFun同你瘋狂障礙跑11個障礙全面睇，再加必睇注意事項！即刻去片！
大部份障礙同網上片段睇到o既都幾似，亦都有幾個係完全唔一樣o既～
官方吹氣障礙設計圖：
瘋狂障礙跑
日期: 21/11/2015
地點: 啟德郵輪碼頭對開空地
收費: 公開組(13歲以上) 每位$480
親子組(一位6-12歲小童及一位21歲或以上家長)每組$680
截止報名日期: 16/11/2015
查詢電話: 5901 7194 (10:00am – 07:00pm)
Facebook: www.facebook.com/crazyinflatablerun
其他資訊:
注意事項:
![[有片] 瘋狂障礙跑殺到，實物試玩率先睇！](https://topfunhk.wpenginepowered.com/wp-content/uploads/2015/11/瘋狂障礙跑殺到，實物試玩率先睇！5.jpg)
瘋狂障礙跑Crazy Inflatable Run下星期六o係香港舉行，參加者除左齋跑之外，亦都會沿途挑戰11個大型吹氣障礙！等你捐下爬下跳下瀡下…… 有趣地完成3公里路程跑步運動。
外國Insane Inflatable 5K o既網上片段相信大家都睇過，究竟今次Crazy Inflatable Run o係香港o既吹氣障礙實物又係點樣？即刻去片！
記招展出o既其中一個障礙”Can I Rest!”
上落位
裏面，基本上呢一個障礙就係一個吹氣彈床
彈床中間有條吹氣橫樑，負責人話係用黎防止跑手衝得太快衝左落去，幫你剎一剎制。捐過去又得，勁d跨彈過去亦得～ 😛
充氣位，拍埋去其實都有差唔多兩個人咁高。
瘋狂障礙跑
日期: 21/11/2015
地點: 啟德郵輪碼頭對開空地
收費: 公開組(13歲以上) 每位$480
親子組(一位6-12歲小童及一位21歲或以上家長)每組$680
截止報名日期: 16/11/2015
查詢電話: 5901 7194 (10:00am – 07:00pm)
Facebook: www.facebook.com/crazyinflatablerun
之前講過「瘋狂障礙跑 Insane Inflatable 5k 11月殺到黎香港！！」，最近佢地終於公佈活動詳情喇！
根據官方Facebook Page，瘋狂障礙跑將於 21~22/11/2015 o係香港啟德郵輪碼頭對開政府官地舉行！
之前已經預先登記o既參加者應該會o係11月2號收到相關電郵。
活動資料
參加對象：
公眾跑 - 13歲或以上
親子跑 - 21歲或以上家長或監護人陪同6至12歲小童
參加者可自行組隊互相協助完成整個賽程及關卡。
報名費用：
公眾跑 - 每名參加者報名費為港幣480元。
親子跑 - 二人跑套票港幣680元*。
*親子跑套票只適用於一位21歲或以上家長或監護人與一位6至12歲小童一起購買。
場地:
香港啟德郵輪碼頭對開政府官地
瘋狂障礙跑 Crazy Inflatable Run官方Facebook Page
報名：http://crazyrun.ievent.hk/formSingle/create
唔知係咩黎？即刻睇番之前個post或者睇片啦！:D
源自美國的瘋狂障礙跑Insane Inflatable Run 5K，將於11月殺入香港！
對於少運動的香港人來說跑步也許是個陌生的詞語，但瘋狂障礙跑將會為跑步帶來新定義！瘋狂障礙跑全長超過5公里，每半公里將設置巨大的充氣障礙訓練埸，參賽者可攀爬、跳躍，挑戰10種不同的障礙。除了個人參賽外，亦可以團體或公司名義參賽，一同與親朋好友享受跑的全新體現！
挑戰11種不同的障礙
想預先登記？
年滿13歲：按此
；
6-9歲障礙跑 (個人跑) 或6-8歲親子障礙跑 (二人同跑) ：按此
瘋狂障礙跑在美國一年舉辦超過五十場，香港的舉行地點、日期及報名費將於2015年9月20日公佈，有興趣的朋友可密切留意他們的Facebook專頁。
在澳大利亞墨爾本，一家新的遊戲中心剛剛開張，這家遊戲中心名叫Zero Latency（零延遲），位於一個佔地4300平方英尺（400平方米）的倉庫之中。看起來也不是很大嘛，也許甚至比不上你經常去的電玩城。但這個遊戲中心讓雷鋒網不惜花費一個頁面進行報道的原因是這是世界上第一個開張的虛擬現實遊戲中心！
這個遊戲中心號稱能提供讓人忘記現實的虛擬現實體驗。在該遊戲中，玩家可以使用特製的虛擬現實槍瞄準和攻擊遊戲中的喪屍，另外，玩家還能在遊戲場景中基本上自由地走動。
據外媒介紹，這個虛擬現實遊戲中心中配置了129個PlayStation Eye攝像頭。
該遊戲中心一次可同時讓六位玩家一起遊戲，在遊戲進行時，每一位玩家都要背上一個裝有一台Alienware Alpha PC的揹包，裏面的計算機能夠幫助玩家佩戴的Oculus Rift DK2虛擬現實眼鏡構造真實感更強的虛擬現實環境。
據該遊戲中心的創始人Scott Vandonkelaar介紹，事實上早在Oculus Rift還在眾籌的時候他就有建立這樣一個遊戲中心的想法了；當然，這也可能是我們每一個人的想法。
在這個月初，該遊戲中心就已經在網上開始接受預約報名了，每人收費65美元，截止目前已經有數百人報名。
宣傳片：
正啊喂！唔知香港遲D會唔會都有得玩呢？！