近日途經長沙灣元洲邨，見到公園裏面冇啦啦有成堆人o係度舉機影相。
一睇，原來元洲邨公園裏面o既杜鵑花隧道開花喇！
呢條約30米長o既簕杜鵑花隧道，每逢3至4月，漸次綻放，構成浪漫動人景致，吸引唔少人專登停步影下靚相，甚至係專誠搭車過黎一睹如此萬紫千紅。目前正值開花初期，據知遲d應該會開得仲靚，至最美麗時期，仲會有滿地花瓣配合整個景致！
當日仲遇到model專登黎擺post影相～
無論係親子去公園玩賞花影靚相、三五知己閒逛、抑或係情侶o係花廊中拖手漫步，都寫意非常，能夠令人心曠神怡。
除左簕杜鵑花隧道之後，附近亦種有其他花種，以及香港常見o既洋紫荊花。
元洲邨杜鵑花隧道
開花時期：3月-4月
地點：長沙灣元洲邨公園 (長沙灣港鐵站C2出口)
元宵節就到喇！呢個中式情人節有咩玩？今年元宵特備節目《元宵戲棚懷舊墟》睇黎都係唔錯o既選擇！充滿懷舊情懷同文化氣息。
新光戲院，作為本地一座粵劇殿堂，有着傳承粵語文化o既使命。為進一步推動多元藝術文化活動，耗資七位數字，將新光戲院二樓打造成新光文化展覽廳。
一連四晚《元宵戲棚懷舊墟》係佢地o既頭炮活動，以 保育。真香港情懷 為目標，喚醒大家對香港老日子o既前塵往事。
一入門口就有大家平時好少會見到o既 迷你傳統戲棚花牌，場內仲有各式各樣懷舊美食，如：麥芽糖、精記蛋卷、龍鬚糖、飛機欖等等。
活動方面，大會請黎著名 Henna 繪畫師 Helen LO 駐場為情侶繪畫無名指情侶圖騰，為今年元宵節增添刻骨銘心o既小浪漫。仲有本地人氣漫畫家Casey Lee即場為入場人士繪畫懷舊人像照。著名化妝兼造型師 Man Chan 借出珍貴o既黄金鳳冠，免費提供俾入場人士於指定 photo op區域試戴同拍照留，仲有花旦服同書生服俾大家試着同影相添！機會難逄！
元宵戲棚懷舊墟
日期 : 2016/02/19-2016/02/22
時間：1800-2200 (周五&周一)
1400-2200 (周六&周日)
地點：新光文化展覽廳 (北角新光戲院二樓)
入場費用 : 免費
活動贈品：入場人士消費滿 HKD100，即送開運占卜麻雀一套。(數量有限，送完
Facebook：https://www.facebook.com/events/1677449882512937/
攤位名單：
1. 香港專業點心師總會：戲棚粥 (豬骨菜乾粥) (蠔仔粥) (魚肉粥) (肉鬆粥)、糖不甩、麥芽糖、手造雞蛋卷
2. 香港老字號精記蛋卷、鳳凰卷
3. 大帽山茶水亭蓮姐魚蛋、山水豆漿、鎮店之寶牛油茶葉蛋
4. 香港著名懷舊甜品店砵仔王涼果 (檸檬王、話梅、砵仔糕、白糖糕、龍鬚糖、叮叮糖等。)
5. Henna 手繪師 Helen Lo無名指情侶圖騰
6. 著名造型師 Man Chan 主理之大龍鳳自拍區
7. 占卜星相
8. 人像漫畫懷區
9. 飛機欖
10. 新光作品影碟區
近來「Light Rose Garden HK 玫瑰燈海園 – 香港站」，展出約25,000朵LED白玫瑰，組成一片璀燦LED玫瑰燈花海，引起熱話！
據說情人節當日海濱長廊同添馬公園仲大排長龍～
唔想同人逼？原來香港呢排仲有兩個地方有得睇呢個LED玫瑰燈花海！雖然係迷你版，不過影出黎都依然係幾靚幾浪漫架。
日期: 15-23/2/2016
地址: 銅鑼灣Fashion Walk食街
亮燈時間: 12:00-21:00
Facebook: https://www.facebook.com/HK.FashionWalk/posts/947730148596201
日期: 15-23/2/2016
地址: 山頂山頂道118號山頂廣場3樓Green Terrace
亮燈時間: 14:00-20:00
Facebook: https://www.facebook.com/PeakGalleria/posts/1022012614503632
更多：
中西區海濱長廊及添馬公園25,000朵LED玫瑰燈花海：http://goo.gl/Xp05Gd
仲有幾日就情人節喇，諗好去邊未？搵野玩，黎TopFun！等TopFun幫手俾d情人節好去處你啦～！
代表著愛在處處o既「Light Rose Garden HK 玫瑰燈海園 – 香港站」，展出約25,000朵LED白玫瑰，組成一片璀燦花海，每晚6點就會點亮！
朵朵純白玫瑰於白天綻放白色浪漫，點點暖白於黑夜發放繁星光芒，o係西方情人節同中國元宵節(2月14日至2月22日)雙重情人佳節期間，分別以怡人草坪同醉人維港做背景，將愛o既光芒到處發放。
睇相都覺得勁浪漫啊！又可以影番d閃光相呃like，女朋友一定勁buy！
Light Rose Garden玫瑰燈海園‧香港站
日期：14-22/2/2016
亮燈時間：每晚6時至11時
地點：14-16/2中西區海濱長廊(中環段), 20-22/2 添馬公園
網址：http://www.lightrosegarden.com/
*2月17至19日玫瑰遷移期間亦如常對外開放
講到香港浪漫地方，又點少得愉景灣？！今個情人節，愉景灣以「情約花季」為主題，將每個角落佈置得花團錦簇，猶如歐洲小花園。仲有花之隧道、心鎖長廊、情人節觀光馬車暢遊(需另行購票)。
其中年度經典時刻，大白灣沙灘每年情人節都會燃起o既千點心形燭光，更係浪漫非常，不能錯過！o係對岸迪士尼煙花映襯下，見證無數愛的宣言，為甜蜜愛情故事添上難忘一頁。
愉景灣情約花季
日期：即日起至14/2/2016 (千點心形燭光14/2 6-11pm，心型愛情鎖13-14/2)
地點：愉景灣愉景北商場及D’Deck
Facebook：https://www.facebook.com/VisitDiscoveryBay
*凡於2月13日及14日下午4時至8時，於愉景北商場服務台出示已「讚好」香港愉景灣Facebook專頁，可獲得心形愛情鎖乙個，每人每日只可換領一個心形愛情鎖。每日限定400個，數量有限，先到先得。
今年情人節同白色情人節，黑暗中對話將動人一刻帶進黑暗空間。摒棄視覺，只信感覺下，伴侶將會「二人一杖」走進黑暗，談一場「黑」骨銘心o既愛情。「出雙入對」情人節之旅精選體驗場景包括：邂逅﹕與愛侶踏上「恩愛橋」走過浪漫，掛上心心相印匙扣，象徵緊扣相連，情人節及白色情人節期間體驗館特設「Just Touch」愛的觸摸展覽，以觸感去感受愛。夠哂特別難忘！
黑暗中對話「出雙入對」情人節之旅
日期：10-14/2, 10-14/3/2016
時間：指定時間(12noon-7pm之間入場, 每場約75分鐘)
地點：美孚景荔徑8號盈暉薈2樓
語言：廣東話
費用：每位$280
網址：http://www.dialogue-experience.com.hk/web/subpage.php?mid=113
*需提早預約
預祝大家情人節快樂！Couples們甜甜蜜蜜！<3
農曆新年就到喇！想體驗下台灣傳統放天燈祈福？香港都有得「放天燈」！為慶祝新春佳節同誠品書店即將落戶，太古城中心特意由即日起至2月22日期間呈獻「天燈祈福迎新春」，以象徵祈福納喜o既天燈做主題，將商場二樓中橋位置打造成「新春天燈園」，二百盞明亮天燈印有由多國語言如中、英、日、韓文寫成o既祝福語句，俾訪客分享滿滿祝福！
場內掛起超過二百盞天燈，天燈於天花四周縱橫交錯，以澄黃及桔橙兩色為主、大小不一、鮮艷雅緻，營造出浩瀚浪漫燈海。
另外，二樓舞台位置除左同樣打造漫天燈海怡人景象外，更設置一個4.8米高大型天燈許願互動裝置，俾訪客體驗「放天燈」樂趣，並為親友摰愛於新年送上最窩心及溫暖o既祝福同冀願！
訪客只需先讚好太古城中心Facebook或「追蹤」全新Instagram專頁，並於天燈帖文內按「讚」及於留言中標籤一位朋友，即可於現場透過應用程式自選喜愛o既天燈設計圖樣，以及配上心水潮語賀句如「愛神射住你，財神抱住你」、「高中狀元榜，科科5＊＊」等，將個人化祝願呈現於巨型天燈電子螢幕上，天燈徐徐升起，寓意讓希望升空，夢想成真。當天燈上升至一半高度時，畫面更會貼心靜止十數秒，俾訪客拍照留念。
太古城中心 ｢天燈祈福迎新春」
日期: 即日起至2月22日
時間: 21/1-22/2 11am-9pm; 8/2(年初一) 12noon-9pm; 15/2(年初八) 1pm-9pm
地點: 太古城中心
查詢: (852) 2568 8665
網頁: http://www.cityplaza.com/zh-HK/events/LIVE_HAPPY.aspx
想睇雪想過白色聖誕？除左去外地之外，香港今年都有幾個短期玩點(好去處)有飄雪睇！
1. 太古城中心「紅鼻鹿飄雪聖誕之旅」
今個聖誕，太古城中心特意以紅鼻鹿Rudolph為主題，於12月1日至2016年1月3日獨家呈獻「紅鼻鹿飄雪聖誕之旅」。商場於二樓舞台及中橋位置打造別出心裁o既紙品聖誕裝置，呈現多個經典紅鼻鹿童話場景，上演一幕幕聖誕傳奇故事。到時冰上皇宮仲會帶黎全港首個冰上飄雪聖誕，漫天飛雪飄落冰場，俾訪客於20呎高聖誕松樹同紅鼻鹿見證下，投入冰上白色聖誕！
太古城中心引入先進室內飄雪設備，製造出雪花紛飛o既浪漫景緻。活動期間，皚皚白雪每三十分鐘就會由高空徐徐飄落！場內有8部製雪機，每次3分鐘飄雪效果仲會配合燈光同音樂效果，甚為浪漫！而人造雪其實係無色無味泡沫，落地即化。
地點：太古城中心一樓冰上皇宮
日期 ：即日至2016年1月3日
時間：11:00-21:00(每30分鐘1次)
價錢：溜冰場票價$55-$75
Facebook：www.facebook.com/Cityplaza-Ice-Palace-太古城中心冰上皇宮-272231186122/
網頁：www.cityplaza.com/zh-HK/entertainment/ice-palace
2. 荔枝角D2 Place飄雪天台
D2 Place 打造全港首個「Snowy Garden 飄雪天台花園」，12月起每個星期六、日晚上，及12月24-31日期間，都有浪漫飄雪！仲有3米高巨型水晶球！逄週末仲有市集行街街，算得上係其中一個聖誕浪漫打卡影相好去處！
地點：荔枝角長義街9號D2 Place ONE天台花園 (荔枝角D2出口對面)
日期 ：2015年12月逢星期六及日及12月24-31日
時間：18:00-22:00
價錢：免費
Facebook：www.facebook.com/D2Place/
網頁：www.d2place.com/
3. 香港迪士尼樂園美國小鎮大街
香港迪士尼樂園一踏入聖誕，園內o既美國小鎮大街都會漫天飄雪！今年迪士尼樂園同樣有人造雪，根據往年經驗，大概每晚6點就會開始飄雪，既適合情侶拍拖浪漫下，又適合一家大細合家歡去感受白色聖誕！相信十分難忘。
地點：香港迪士尼樂園美國小鎮大街
時間：約18:00, 詳情可再向園內職園查詢
價錢：$499-$539(一日標準門票票價)
Facebook：www.facebook.com/disneyland.hk/
網頁：www.hongkongdisneyland.com/zh-hk/events/happily-ever-after-christmas/
4. 黃埔新天地「雪感聖誕玩樂園」
紅磡黃埔新天地今年聖誕開設「雪感聖誕玩樂園」，由12月19日起於指定日子於時尚坊地庫設置香港首個室內以人造雪製作o既遊樂天地，等小朋友同白雪玩遊戲！「雪感聖誕玩樂園」現場不但不時飄雪，大家仲可以於「親親雪地」o既白皚皚仿真雪地上玩樂，感受柔細輕涼o既雪o既感覺！又可以坐雪兜體驗一下o係兩條各長20呎、鋪滿人造雪o既「雪地滑梯」滑落黎o既興奮速度同至Cool感覺！於12月19-20及25-27日，小朋友更加可以憑指定消費參加「聖誕手作坊」，親手製作多款聖誕手工藝。
*不過注意樂園只限身高0.8米至1.4米人士入場，即係得小朋友先有得玩喇~！
如果去開黃埔就唯有去黃埔號影LED玫瑰花海聖誕燈飾啦。
地點：黃埔新天地時尚坊地庫
日期：2015年12月19日-20日，2015年12月25日-27日，2016年1月1日-3日
時間: 13:00-18:00
價錢：只要即日於商場消費滿$100元或以上，便可入場參與其中一項活動
Facebook：www.facebook.com/whampoaworld
網頁: www.whampoaworld.com/whatshot_index_chi.asp?whID=596#
旅發局今年7月推出「閃躍維港」3D光雕匯演，o係文化中心外牆用色彩繽紛o既多媒體影像，帶出「大買‧愛吃‧玩不停」o既推廣主題，吸引唔少旅客同市民駐足觀賞。
新一輪聖誕版3D光雕匯演又黎喇！繼續o係尖沙嘴上演，一直至到12月28日都有！每晚20:20、20:45、21:15、21:45共演4場，每節大約8分鐘，以聖誕童話故事為主題，配合旅發局「香港繽紛冬日節」推廣。
「從前，有一個小女孩向聖誕老人寄信祈願，希望能過一個奇妙聖誕及獲得一隻粉紅熊貓布偶作為禮物。於是，聖誕老人便派出一眾小精靈專程前往香港，為不同地區換上節日新裝，並合力達成小女孩的願望……」
到時候，香港文化中心同前九廣鐵路鐘樓外牆將會幻化成冬日故事書，透過立體影像、燈光同特別音響效果，為旅客同市民訴說夢幻o既聖誕故事。匯演期間，旅客同市民仲將會睇到小精靈將佈置飾品送到香港，然後忙著穿梭大街，為建築物安裝上五光十色o既聖誕燈飾，同將聖誕樹送至商場作為點綴！最後更不忘為小女孩送上禮物，呈獻一個奇妙、溫馨o既聖誕。
搵晚同屋企人或者另一半去感受一下呢份冬日o既溫馨浪漫啦～！<3
新一輪「閃躍維港」3D 光雕匯演詳情
日期：2015 年 12 月 9 日至 12 月 28 日
時間：晚上 8:20、8:45、9:15、9:45，每節約 8 分鐘
最佳觀賞地點：九龍尖沙咀香港文化中心露天廣場
備註： 香港文化中心露天廣場每晚將播放匯演的主題音樂，觀眾亦可下載「閃躍維港」主題音樂應用程式收聽音樂
網頁： DiscoverHongKong.com/hkpulse/tc
為慶祝香港摩天輪開幕一周年，市民12月5日至12月6日購買摩天輪門票時，出示有效之香港身分證，便可享有門票半價優惠。此優惠適用於購買成人(100元)、學生(70元)、65歲或以上長者、殘疾人士及3-12歲兒童門票，亦適用於購買包廂以及貴賓車廂門票。憑票尾及香港身份證，更可以半價享用摩天輪美食車的德國熱狗和比利時窩夫等小食。
門票種類及價錢（原價）：
成人：$100
小童（3-12歲）：$70
學生：$70
長者：$50
傷殘人士：$50
包廂門票(2 – 3 人)：$500
包廂門票 (4 – 8 人)：$800
貴賓車廂門票 (2 ‒ 3人)*：$1,500
貴賓車廂門票 (4 ‒ 5人)* ：$2,500
* 包括特快專屬通道
注意：半價優惠只限到場購票，以及只限當日使用，所以不設網上預訂。
難得半價優惠，可以帶埋屋企人或者另一半溫馨浪漫一番！<3
香港摩天輪半價優惠：
日期：12月5日及12月6日
時間：10am-11pm (周年優惠特別開放至凌晨1時)
地點：中環民光街33號 (公眾碼頭9號對出)
網頁：http://www.hkow.hk