5月份天氣溫暖，唔少香港人放假都會選擇去郊區行下山，既低消費，又可以親親大自然，放鬆一下～！
行山遠足雖然係一個健康且減壓o既活動，但每年都有發生遠足人士失蹤事件，所以遠足安全絕對不能忽視。
為左協助搜救隊伍搜尋遠足失蹤者，香港通訊業聯會（CAHK）特別義務推出「50222遠足短訊留蹤」服務。遠足人士只要將郊野公園遠足徑上標距柱o既編號，以短訊發送至50222，資料就會被保密儲存三日。期間如果遠足人士不幸發生意外，搜救隊伍就可以參考佢事前留下o既標距柱編號，協助搜尋失蹤者，增加搜救機會同速度。
做法：
1. 遠足人士在郊野公園遠足徑遠足時，路經標距柱，會見到每條標距柱均有獨立的編號，如麥理浩徑第一個標距柱編號為M001。
2. 將標距柱上的編號（如M001），以手機短訊傳送至50222。
3. 短訊留蹤服務中心會隨即回覆確認短訊。 [如: 短訊已收到。請小心遠足安全！]
4. 途經每一個標距柱，遠足人士均可重覆以上動作，讓系統可更準確掌握你的遠足路線。
5. 資料會被加密儲存在服務中心3天。如期間沒有意外求助報告，3天後資料會自動刪除
6. 期間如遠足人士遇到意外失去聯絡，親友報案後，有關方面出動搜救。
7. 在搜索隊伍要求下，服務中心會將遠足人士早前提供的標距柱位置資料，傳送搜救隊伍以協助搜救失蹤者。
常見問題：
Q. 是否任何流動電話服務均可使用50222遠足短訊留蹤服務？
A. 所有使用香港五大流動網絡服務供應商，包括中國移動香港、CSL(1010、one2free、新世界傳動網) 、PCCW mobile、數碼通、3HK的流動電話服務均可使用。
Hint: 流動電話預付卡用戶須確保親友知悉電話號碼，在報案時能提供正確的流動電話號碼，搜救隊伍才能應用短訊留蹤系統協助搜救。
Q. 使用服務要預先登記嗎？要不要收費？
A. 無須登記，所發留蹤短訊將不另收費。
Hint: 在接近邊境地方遠足的人士留意，發短訊前請檢查是否已進入內地網絡，如是短訊則會作漫遊收費。遠足人士可考慮返回本地流動網絡覆蓋時再發短訊留蹤，又或採用網絡服務供應商的各種漫遊優惠。
Q. 能否透過智能電話或設備提供的短訊應用發放50222短訊？
A. 暫時來說，50222遠足短訊留蹤服務只適用於香港五大流動網絡服務供應商所提供的短訊服務，一些智能電話或設備所提供的短訊應用軟件，以及透過網絡軟件所發放的文字訊息均不適用（如Skype）。
Hint: CAHK正研發50222短訊應用軟件供智能電話或設備使用，並將於服務的第二階段推出。
Q. 短訊內容要包括什麼？
A. 只需上載標距柱編號（如M001）即可，不用任何內文，簡易快捷。若短訊載有其他內文，系統會發出短訊回覆至該遠足人士的手機，告知正確的格式。
Hint: 系統只會提供符合正確格式的標距柱編號資料，及有關訊息之發放時間予搜救隊伍參考。
Q. 什麼人會看到我的短訊留蹤資料？
A. 資料會直接送到香港通訊業聯會（CAHK）的短訊留蹤中心自動加密記錄，保留三天然後刪除。如三天內接報要求協助，服務中心會檢查資料庫，如有相關資料便會直接電郵給負責搜救單位。
Hint: 失蹤者家人也不能索取短訊留蹤資料。當有遠足人士失蹤時，搜救隊伍會按既定程序搜救，並視乎需要才會索取短訊留蹤資料協助尋人。
Q. 假如我打錯標距柱編號，或忘記發放短訊，或同一短訊發送沿途多支標距柱編號，會有問題嗎？
A. 無論是打錯或忘記發放標距柱編號，遠足人士只要再發放一個最新及正確之編號留蹤即可。
如打錯標距柱編號格式或同一短訊內發放多支標距柱編號，系統則會發出短訊通知該遠足人士重新發送正確格式之標距柱編號留蹤。
Hint: 是項服務鼓勵遠足人士行經每個標距柱，均以短訊留蹤，以構成一條完整的路線圖，方便搜救單位準確釐定搜救範圍。
Q. 我找不到標距柱，可否輸入沿途上的其它標記資料？
A. 此服務暫時只接受郊野公園遠足徑上的標距柱編號。
Q. 我收不到確認短訊？
A. 確認短訊會即時發放，如遠足人士未能收到確認短訊，請重試發放留蹤短訊，或稍後到網絡接收良好的地方再試。
50222 遠足短訊留蹤服務
電郵: smsenquiry@cahk.hk
電話: 2863 9903
網址: http://www.cahk.hk/50222SMS/50222_SMS_Chi.htm
即刻share俾各位行山友啦～！(y)
踏入秋冬季，又係紅葉轉紅o既日子。前幾日聖誕假，新聞報導指出有大量人潮前往大棠睇紅葉，高峰時期多達超過600人等巴士走，更有人指紅葉同人o既數目比例達到1000:1。lol
根據漁護署今年新出o既紅葉情報，目前大棠o既紅葉指數達到A & B，即係極紅同開始紅。不過FB同IG上面o既相大多加左filter，究竟大棠紅葉紅未？紅左又有幾紅？係咪真係多人到咁誇張？
12月27號當日，TopFun朋友仔去行左個圈，為你實地直擊一下！
要去大棠(其實即係大欖郊野公園)可以o係元朗搭K66巴士或者紅色小巴；或者o係朗屏搭K66巴士，然後o係大棠山道(僑興路)站落車。
大概係中午3點，落左車之後，其實跟住d人行o既方向一齊行就得，哈哈哈！慢慢行大概20分鐘，就會見到「大欖郊野公園」個牌！沿路都幾有大自然氣色，好多綠色樹木，黎到郊區當堂空氣都好左！
不過，其實入到郊野公園先真係開始行去楓香林。牌前留完影之後，面前係一條分叉路，一邊係上樓梯，一邊係普通少少斜o既路。個牌係指你上樓梯o既，最後我地發現其實兩條路都上到燒烤場。
行樓梯一上到燒烤場就見到新聞報導話30人排隊o既洗手間，又真係幾多人。不過其實燒烤場另一邊仲有一個洗手間。原來大棠個燒烤場係咁大架！！(我對大棠o既印象只係停留o係小學雞去大棠荔枝山莊…) 環境其實都唔錯，有唔少人o係度BBQ，亦都有人o係涼亭同地下鋪地墊野餐，彈ukulele。果度有個小食亭賣薯片玩具果d，仲有少量岩小朋友玩o既設施。
抖抖繼續行，沿路都有d花花草草睇下o既。至於係咪真係咁people mountain people sea(人山人海)呢？之前睇d報導影住d人潮，真係多人到好似旺角行人專用區、好似行花市、好似去拜山咁密麻麻；我真係以為沿路都係咁多人，大家一路排住隊咁行，哈哈！原來其實主要都係某d位會特別多人滯留，所以先會影出一幅人頭湧湧o既場面。當然，亦都可能係因為當日天氣唔太好，所以少左人去睇紅葉。
行到咁上下，終於見到2-3棵樹有紅葉！不過就真係細細棵同唔太茂盛。再行下又會再見到多幾棵。果陣心諗，如果剩係睇呢幾棵都幾灰機……
不過根據情報，最多紅葉o既位係o係一個小斜坡，同一個涼亭隔離。由燒烤場慢行大概30-40分鐘，就終於見到說好的小斜坡喇！！之前成日見到d相d人走哂上斜坡影相，但原來果度係有個牌叫你唔好走上去架哈哈～
呢d位好多人……
基本上都叫見到一堆紅葉，有黃有橙有紅，但又未至於話好靚。繼續向前行多幾步，就終於會見到大棠睇紅葉熱點位──涼亭。果度有大概十幾棵相當高而有紅葉o既樹，一堆紅葉睇起上黎密好多。而果度o既紅葉的確如漁護署所講，係有d開始紅有d十分紅。
影左幾張相之後，突然就落大雨，一堆人好似玩爭凳仔咁衝哂入涼亭避雨。之前見到有篇網上文章，寫細雨朦朦賞楓葉，景色別有一番美；加上二人一傘，雨下漫步，聽落都覺得浪漫！不過當日現實係，撞正大雨加四人一傘，別有一番搞笑同狼狽。
影靚相方面，除左好似之前出果篇睇紅葉攻略提過，唔好着d同紅葉撞哂色融為一體o既衫之外，實地直擊發現更多搞笑問題同技巧。
如果要同大果幾棵樹o既紅葉合照，基本上你要離遠少少棵樹同埋低炒，同時他拍會比自拍易d影得靚。如果要自拍，最好帶番支自拍神棍！一黎距離遠d，多d紅葉入到鏡；二黎！！！由於部份手機前鏡像素低同有自動美顏效果，部機…… 係會……
美 ‧ 顏 ‧ 埋 ‧ d ‧ 紅 ‧ 葉。 哈哈哈哈哈哈哈！如果冇神棍+後鏡自拍都幾難控制。
「冇filter V.S. 有filter」。如果要呃like，睇黎都係加左filter吸引d喇！
值得注意，其實入到大棠都唔會覺得凍左，可能行起，反而元朗好似仲凍d，不過落雨之後就凍左好多。由於落雨所以唔係影左好多相，好快就沿路離開。
至於傳說中o既600人等巴士走呢？離開時候大概係6點，岩岩日落，天有少少黑，又真係幾多人等巴士。睇條龍以為要第2-3架先上到。不過可能年紀大少少o既啊姨伯伯比較多，得番企位佢地會等下架，所以唔怕企一陣的話其實好快上到車。而當日搭果架巴士企位其實都唔逼。當然，唔同玩家可能會遇到唔同情況。
我地係搭星期日同公眾假期先有o既K66特別路線，總站朗屏落車，行兩步就番到朗屏西鐵站。完成大棠睇紅葉行程！Yeah！
整體黎講，大棠紅葉其實都已經紅得差唔多，但冇想像中咁靚咁多；不過休休閒閒行下，親親大自然，呼吸下新鮮空氣，都幾放鬆同舒服！不失為一個假日好去處！
至於一心要影紅葉靚相o既，就考你功夫喇哈哈！
最後送大家一張執左充滿秋意o既相:)
大棠睇紅葉
交通 :
大棠山道 (僑興路) 站下車。
*紅葉季節 K66特別路綫：
日期: 2015年12月19日-2016年1月31日
星期日及公眾假期：
去程時間: 10:30-16:00 (由朗屏開出) 每15分鐘一班
回程時間: 13:00-19:00 (由大棠山道開出) 每15分鐘一班
星期六(只有回程)：
時間: 16:00-19:00 (由大棠山道開出) 每15分鐘一班
地點: 朗屏站B2出口(宏達路悅屏樓路邊)來往大棠山道，不設中途站
*駕駛朋友注意：運輸署公告2015年12月6日-2016年1月31逢星期六、日及公眾假期上午七時至晚上七時大棠山路由其與僑興路交界以東約475米處起至大棠山道停車場為止一段將會間歇性封閉，禁止所有車輛進入。實際封路時間或會視乎需要而提早執行。
更多：