陽光下草地野餐大家可能試得多，月光下與中環維港夜景相伴嘅野餐會你又試過未？由CVM主辦，以夜光為主題既TGIF Night Picnic將於2016年7月15日夜晚嚮中環海濱活動空間嘅「中環夏誌」舉行！
星期五晚約理朋友、伴侶、同事、同學，真正踏入「核心內圍」，一路野餐一路聽音樂，輕輕鬆鬆迎接周末來臨~~~同場仲可以玩埋光影畫(light painting)同整星空瓶(galaxy bottle)添！
無須報名，免費即場參加！TGIF！親親大自然聽下音樂鬆一鬆都係唔錯嘅選擇～
參加嘅朋友仔當日可以：
~穿著黑色/深色衫，或有夜光、螢光圖案嘅衫
~自攜美食同野餐墊
~帶同任何發光、螢光、夜光、閃亮嘅飾物、裝飾、裝置，令你嚮黑夜之中格外出眾
~帶一個用完洗乾淨嘅玻璃樽嚟整星空瓶
~如想跟攝影師學影light painting可自備單鏡反光相機，或在場由攝影師替參加者拍攝
注意事項：
*場內不得生火，不可點燃蠟燭
*為響應環保，不建議用螢光棒
【音樂演出】五隊活躍於街頭表演嘅音樂組合，包括 Men In Crime、Cuckoopella、Carsic、CUBE同埋Exotic，將會由街頭走到中環夏誌，用音樂陪大家度過特別嘅周五夜晚！
【免費地蓆】無野餐墊？唔想拎？唔緊要，聽日嚟TGIF Night Picnic即場送張免費地蓆俾你！大熱天時去沙灘都好啱架！
註：數量有限，送完即止
TGIF Night Picnic at 中環夏誌
日期: 15/7/2016 (五)
時間: 18:30-21:30
地點: 中環海濱活動空間
費用: 免費即場參加，無須報名
Facebook: https://www.facebook.com/events/494340737438484/
踏入秋冬季，又係紅葉轉紅o既日子。前幾日聖誕假，新聞報導指出有大量人潮前往大棠睇紅葉，高峰時期多達超過600人等巴士走，更有人指紅葉同人o既數目比例達到1000:1。lol
根據漁護署今年新出o既紅葉情報，目前大棠o既紅葉指數達到A & B，即係極紅同開始紅。不過FB同IG上面o既相大多加左filter，究竟大棠紅葉紅未？紅左又有幾紅？係咪真係多人到咁誇張？
12月27號當日，TopFun朋友仔去行左個圈，為你實地直擊一下！
要去大棠(其實即係大欖郊野公園)可以o係元朗搭K66巴士或者紅色小巴；或者o係朗屏搭K66巴士，然後o係大棠山道(僑興路)站落車。
大概係中午3點，落左車之後，其實跟住d人行o既方向一齊行就得，哈哈哈！慢慢行大概20分鐘，就會見到「大欖郊野公園」個牌！沿路都幾有大自然氣色，好多綠色樹木，黎到郊區當堂空氣都好左！
不過，其實入到郊野公園先真係開始行去楓香林。牌前留完影之後，面前係一條分叉路，一邊係上樓梯，一邊係普通少少斜o既路。個牌係指你上樓梯o既，最後我地發現其實兩條路都上到燒烤場。
行樓梯一上到燒烤場就見到新聞報導話30人排隊o既洗手間，又真係幾多人。不過其實燒烤場另一邊仲有一個洗手間。原來大棠個燒烤場係咁大架！！(我對大棠o既印象只係停留o係小學雞去大棠荔枝山莊…) 環境其實都唔錯，有唔少人o係度BBQ，亦都有人o係涼亭同地下鋪地墊野餐，彈ukulele。果度有個小食亭賣薯片玩具果d，仲有少量岩小朋友玩o既設施。
抖抖繼續行，沿路都有d花花草草睇下o既。至於係咪真係咁people mountain people sea(人山人海)呢？之前睇d報導影住d人潮，真係多人到好似旺角行人專用區、好似行花市、好似去拜山咁密麻麻；我真係以為沿路都係咁多人，大家一路排住隊咁行，哈哈！原來其實主要都係某d位會特別多人滯留，所以先會影出一幅人頭湧湧o既場面。當然，亦都可能係因為當日天氣唔太好，所以少左人去睇紅葉。
行到咁上下，終於見到2-3棵樹有紅葉！不過就真係細細棵同唔太茂盛。再行下又會再見到多幾棵。果陣心諗，如果剩係睇呢幾棵都幾灰機……
不過根據情報，最多紅葉o既位係o係一個小斜坡，同一個涼亭隔離。由燒烤場慢行大概30-40分鐘，就終於見到說好的小斜坡喇！！之前成日見到d相d人走哂上斜坡影相，但原來果度係有個牌叫你唔好走上去架哈哈～
呢d位好多人……
基本上都叫見到一堆紅葉，有黃有橙有紅，但又未至於話好靚。繼續向前行多幾步，就終於會見到大棠睇紅葉熱點位──涼亭。果度有大概十幾棵相當高而有紅葉o既樹，一堆紅葉睇起上黎密好多。而果度o既紅葉的確如漁護署所講，係有d開始紅有d十分紅。
影左幾張相之後，突然就落大雨，一堆人好似玩爭凳仔咁衝哂入涼亭避雨。之前見到有篇網上文章，寫細雨朦朦賞楓葉，景色別有一番美；加上二人一傘，雨下漫步，聽落都覺得浪漫！不過當日現實係，撞正大雨加四人一傘，別有一番搞笑同狼狽。
影靚相方面，除左好似之前出果篇睇紅葉攻略提過，唔好着d同紅葉撞哂色融為一體o既衫之外，實地直擊發現更多搞笑問題同技巧。
如果要同大果幾棵樹o既紅葉合照，基本上你要離遠少少棵樹同埋低炒，同時他拍會比自拍易d影得靚。如果要自拍，最好帶番支自拍神棍！一黎距離遠d，多d紅葉入到鏡；二黎！！！由於部份手機前鏡像素低同有自動美顏效果，部機…… 係會……
美 ‧ 顏 ‧ 埋 ‧ d ‧ 紅 ‧ 葉。 哈哈哈哈哈哈哈！如果冇神棍+後鏡自拍都幾難控制。
「冇filter V.S. 有filter」。如果要呃like，睇黎都係加左filter吸引d喇！
值得注意，其實入到大棠都唔會覺得凍左，可能行起，反而元朗好似仲凍d，不過落雨之後就凍左好多。由於落雨所以唔係影左好多相，好快就沿路離開。
至於傳說中o既600人等巴士走呢？離開時候大概係6點，岩岩日落，天有少少黑，又真係幾多人等巴士。睇條龍以為要第2-3架先上到。不過可能年紀大少少o既啊姨伯伯比較多，得番企位佢地會等下架，所以唔怕企一陣的話其實好快上到車。而當日搭果架巴士企位其實都唔逼。當然，唔同玩家可能會遇到唔同情況。
我地係搭星期日同公眾假期先有o既K66特別路線，總站朗屏落車，行兩步就番到朗屏西鐵站。完成大棠睇紅葉行程！Yeah！
整體黎講，大棠紅葉其實都已經紅得差唔多，但冇想像中咁靚咁多；不過休休閒閒行下，親親大自然，呼吸下新鮮空氣，都幾放鬆同舒服！不失為一個假日好去處！
至於一心要影紅葉靚相o既，就考你功夫喇哈哈！
最後送大家一張執左充滿秋意o既相:)
大棠睇紅葉
交通 :
大棠山道 (僑興路) 站下車。
*紅葉季節 K66特別路綫：
日期: 2015年12月19日-2016年1月31日
星期日及公眾假期：
去程時間: 10:30-16:00 (由朗屏開出) 每15分鐘一班
回程時間: 13:00-19:00 (由大棠山道開出) 每15分鐘一班
星期六(只有回程)：
時間: 16:00-19:00 (由大棠山道開出) 每15分鐘一班
地點: 朗屏站B2出口(宏達路悅屏樓路邊)來往大棠山道，不設中途站
*駕駛朋友注意：運輸署公告2015年12月6日-2016年1月31逢星期六、日及公眾假期上午七時至晚上七時大棠山路由其與僑興路交界以東約475米處起至大棠山道停車場為止一段將會間歇性封閉，禁止所有車輛進入。實際封路時間或會視乎需要而提早執行。
更多：
過完聖誕過完Boxing Day，又係時候諗諗除夕去邊好！搵野玩，黎TopFun！
無論係諗住一大班人過、拍住拖咁過、同屋企人過定自己一個人過，以下呢十大除夕倒數好去處/除夕倒數活動，梗有一個岩你心水！:D
1. 睇煙花
每年除夕，維港都會大放煙花，今年都唔例外！由旅發局主辦o既2015除夕倒數活動以「愛與歡樂」為主題，有8分鐘煙火音樂匯演，包括：煙花、音樂同燈光等多種元素，期間維港上空仲會出現多個心形同超過160個「笑面」圖案，會展會出現「2016」大型字樣，迎接2016年！
而由晚上11:00起，香港島沿海多幢建築物每隔15分鐘會施放流星煙火，名為許願流星，等大家為新一年許番個願。
最佳觀賞位置包括尖沙咀香港文化中心露天廣場及尖沙咀海濱花園、西九龍海濱長廊、中環新海濱、中環9號及10號碼頭一帶、灣仔金紫荊廣場、維多利亞港。活動當晚，預計尖沙咀一帶將由晚上8:00起實施封路措施，建議各位玩家提早前往觀賞地點。
日期︰2015年12月31日
時間︰許願流星 ── 晚上11:00至11:45
煙火音樂匯演 ── 午夜12:00
地點︰維多利亞港兩岸
入場費︰免費
2. 商場倒數活動
除夕當晚，唔少商場都會舉行倒數活動，邀請歌星表演，同觀眾玩遊戲。想熱鬧d多人d感受下氣氛，但係又想留o係室內，唔想咁逼，參加商場o既除夕倒數活動睇下表演都係唔少人o既心水好去處。
即睇今年有乜商場除夕倒數活動：8大商場除夕倒數活動！
3. Party房
各位派對動物，除夕倒數，一定唔少得一大班人齊齊開番個Party！冇人屋企可以Free出黎？唔駛怕，近年香港港九新界都開左唔少Party房，有好多仲係主題Party房，有特別裝修佈置。有地方同私人空間之餘，仲有好多備有各樣娛樂設施，例如麻雀、Boardgame、PS4等等，等大家邊玩邊倒數，開開心心癲番晚！
即睇香港有乜Party房：各間Party房資料同玩評
4. 唱K
儘快將憂愁眼睛憂愁面孔憂愁內心抛棄吧~~~ 送走2015，除夕當晚約老死一齊唱番個K，將唔開心都唱走哂！再唱番d hyper歌，載歌載舞，一齊high爆迎接2016！所謂唔通宵唔知身體好，倒數完仲可以繼續唱通宵K！
即睇香港邊度有得唱K：各個唱K玩點資料同玩評
5. BBQ
今個冬天不太冷，如果一大班人又唔想逼，又想食住野過除夕，可以考慮下去BBQ！大家圍住個火飲下野食下野，談天說地，update下2015發生o既事，一齊展望計劃新一年，諗下都覺得青春浪漫！
即睇香港邊度有燒烤場同天台BBQ：各個燒烤場資料同玩評；各個天台BBQ玩點資料同玩評
6. 嘉年華
想玩想過番個刺激除夕？嘉年華相信係你不二之選！今年有兩大主打機動遊戲o既嘉年華橫跨除夕檔期，包括係AIA歐陸嘉年華同東華慈善嘉年華。AIA嘉年華除夕當晚延長開放時間至凌晨1點，同你一齊倒數！東華嘉年華就收23:00(最後入場時間22:30)，玩完抖一抖就岩岩好倒數喇！兩大嘉年華究竟去邊個好？佢地究竟有咩玩？
即睇：AIA歐陸嘉年華V.S東華慈善嘉年華6大比拼！去邊個好？
7. 露營
2015年最後一日，想離開繁囂城市透透氣，接近下大自然，聞下草味，睇下星星，露營係一個唔錯o既選擇。簡簡單單同另一半、三五知己或者一大班fd輕輕鬆鬆過番晚。
即睇香港邊度可以露營：各個露營熱點資料同玩評；各個露營車玩點資料同玩評
8. 野餐
想室外倒數，有個地方坐下，又唔想過夜又唔想BBQ o既，可以考慮下野餐。雖然好似好少人會夜晚野餐，但係黑夜中，o係泛黃燈光照射下一齊野餐，食下薯片飲下酒，彈下結他玩下game睇下書，別有一番風味。值得留意係一般公園開放時間好少去到凌晨12點，要睇番佢地除夕有有特別延長開放時間。例如西九龍海濱長廊除夕當晚就延長開放時間至凌晨一點。
即睇香港邊度岩去野餐：各個野餐熱點資料同玩評；西九龍海濱長廊
9. 酒吧
想趁大時大節識下新朋友，飲下酒慶祝下，可以選擇去酒吧進行除夕倒數。食下花生，摸下酒杯底，有d仲有beer pong玩，唔駛同人逼之餘，又甚有氣氛。
即睇香港邊度有酒吧：各間酒吧資料同玩評
10. 機鋪
其實毒L一個更開心…… 除夕夜自己一個過都唔駛怕！都總有岩一個人玩o既好去處！去機鋪打番晚機，將所有負面情緒都發泄哂出黎，迎接美好新一年！
即睇香港邊度有機鋪：各間機鋪資料同玩評
快d plan定除夕去邊個好去處啦！<3